ਪੀ.ਏ.ਯੂ. ਵਿਚ ਕੌਮਾਂਤਰੀ ਨਾਰੀ ਦਿਵਸ ਮੌਕੇ ਵਿਸ਼ੇਸ਼ ਭਾਸ਼ਣ ਕਰਵਾਇਆ ਗਿਆ

ਪੀ.ਏ.ਯੂ. ਦੇ ਮਾਨਵ ਵਿਕਾਸ ਅਤੇ ਪਰਿਵਾਰ ਅਧਿਐਨ ਵਿਭਾਗ ਨੇ ਬੀਤੇ ਦਿਨੀਂ ਕੌਮਾਂਤਰੀ ਨਾਰੀ ਦਿਵਸ ਦੇ ਮੌਕੇ ਇਕ ਵਿਸ਼ੇਸ਼ ਭਾਸ਼ਣ ਕਰਵਾਇਆ| ਇਹ ਭਾਸ਼ਣ ਨਾਰੀਤਵ ਦੀ ਆਤਮਕ ਸ਼ਕਤੀ ਦੀ ਪਛਾਣ ਵਿਸ਼ੇ ਤੇ ਕਰਵਾਇਆ ਗਿਆ ਸੀ ਅਤੇ ਇਸ ਭਾਸ਼ਣ ਦੇ ਬੁਲਾਰੇ ਕੁਮਾਰੀ ਬੀ ਕੇ ਜੋਤਸਨਾ, ਇਕ ਪ੍ਰੇਰਨਾਦਾਇਕ ਬੁਲਾਰੇ ਬ੍ਰਹਮਕੁਮਾਰੀ ਅਤੇ ਉਹਨਾਂ ਦੀ ਟੀਮ ਸਨ| ਬੁਲਾਰੇ ਨੇ ਇਸ ਮੌਕੇ ਕਿਹਾ ਕਿ ਹਰ ਔਰਤ ਕੋਲ ਔਰਤ ਹੋਣ ਦੀ ਇਕ ਵਿਸ਼ੇਸ਼ ਸ਼ਕਤੀ ਹੁੰਦੀ ਹੈ| ਉਸਦਾ ਅਹਿਸਾਸ ਅਤੇ ਪਛਾਣ ਹੀ ਸਭ ਤੋਂ ਜ਼ਰੂਰੀ ਹੈ| ਇਸ ਤੋਂ ਇਲਾਵਾ ਉਹਨਾਂ ਨੇ ਔਰਤ ਦੇ ਨਾਲ ਜਨਮ ਦੀਆਂ ਅੱਠ ਸ਼ਕਤੀਆਂ ਦੀ ਗੱਲ ਕੀਤੀ ਅਤੇ ਉਹਨਾਂ ਦੀ ਵਰਤੋਂ ਦੇ ਤਰੀਕੇ ਵੀ ਦੱਸੇ| ਭਾਸ਼ਣ ਤੋਂ ਬਾਅਦ ਇਕ ਧਿਆਨ ਸੈਸ਼ਨ ਹੋਇਆ ਜਿਸ ਵਿਚ ਭਾਗ ਲੈਣ ਵਾਲਿਆਂ ਨੂੰ ਸਵੈ ਵਿਕਾਸ ਅਤੇ ਸਵੀਕਾਰ ਦੇ ਮਾਇਨੇ ਸਮਝਾਏ ਗਏ|

ਇਸ ਮੌਕੇ ਤੇ ਕਮਿਊਨਟੀ ਸਾਇੰਸ ਕਾਲਜ ਦੇ ਡੀਨ ਡਾ. ਕਿਰਨ ਬੈਂਸ ਵਿਸ਼ੇਸ਼ ਤੌਰ ਤੇ ਹਾਜ਼ਰ ਸਨ| ਉਹਨਾਂ ਨੇ ਸਮਾਜ ਵਿਚ ਔਰਤ ਦੀ ਹੋਂਦ ਅਤੇ ਮਹੱਤਵ ਬਾਰੇ ਵਿਸਥਾਰ ਨਾਲ ਗੱਲਬਾਤ ਕੀਤੀ| ਨਾਲ ਹੀ ਡਾ. ਬੈਂਸ ਨੇ ਵਿਭਾਗ ਦੀਆਂ ਕਾਰਵਾਈਆਂ ਦੀ ਸ਼ਲਾਘਾ ਵੀ ਕੀਤੀ| ਵਿਭਾਗ ਦੇ ਮੁਖੀ ਡਾ. ਸੀਮਾ ਸ਼ਰਮਾ ਨੇ ਇਕ ਬਿਹਤਰ ਸਮਾਜ ਦੀ ਸਿਰਜਣਾ ਵਿਚ ਔਰਤ ਦੀ ਭੂਮਿਕਾ ਨੂੰ ਸਵੀਕਾਰਿਆ| ਇਸ ਸਮਾਰੋਹ ਦਾ ਸੰਚਾਲਨ ਡਾ. ਪ੍ਰਾਚੀ ਬਿਸ਼ਟ ਅਤੇ ਡਾ. ਰਿਤੂ ਮਾਹਲ ਨੇ ਕੀਤਾ| ਭਾਰੀ ਗਿਣਤੀ ਵਿਚ ਵਿਦਿਆਰਥੀ, ਫੈਕਲਟੀ ਅਤੇ ਹੋਰ ਸਟਾਫ ਇਸ ਮੌਕੇ ਹਾਜ਼ਰ ਸੀ|